Fermandarê Giştî yê HSDyê Mezlûm Ebdî derbarê êrişên li ser sûrîyeyîyan yên li bajarên Tirkîyeyê daxuyanîyek da.
Li gorî nûçeya Rûdawê peyama Mezlûm Ebdî wiha ye:
Mezlûm Ebdî di peyama xwe da êrişên li Qeyserîyê şermezar kir û wiha got:
“Tevgera xelkê Sûrîyeyê ya li navçeyên dagîrkirî, tekez dike ku, eger çendîn em nakok bin jî lê doza rûmeta niştimanî û serxwebûna biryara Sûrîyeyê armancên bingehîn in ku me dikine yek.
Di heman demê de em êrişên dijminane yên li ser xelkê Sûrîyeyî yên li parêzgeha Qeyserîyê ya Tirkîyeyê şermezar dikin û banga parastina jîyan û rûmeta wan dikin.
Li Bakur û Rojhilatê Sûrîyeyê li ser axa xwe berê û niha jî em pêşwazî li her welatparêzekî Sûrîyê û birayên xwe dikin û heta niha jî destê me dirêjî hemû gelê Sûrîyê ye ku em welat û gelê xwe rizgar bikin.”
Çi bûbû?
Li Qeyserîyê, kesekî ji Sûrîyeyê destdirêjî li zarokeke 5 salî ya Sûrîyeyî kiribû. Li ser belavbûn û bihîstina vê bûyerê li temamê Tirkîyeyeyê, çendîn kes û koman êrişî sûrîyeyîyan kirin. Wan kom û kesan xanî, dikan û otomobîlên sûrîyeyîyan şewitandin. Serokê Sûrîyeyê Beşar Esed û Serokkomarê Tirkîyeyê Recep Tayyîp Erdogan ên li ser asayîkirina pêwendîyan peyaman didin. Piştî van peyaman, li Sûrîye û herêmên Rojavayê Kurdistanê yên di bin dagirkerîya Tirkîyeyê de ji ber egera pêwendîyên Enqere û Şamê xwepêşandanên tund tên lidarxistin. Li bajarên Efrîn, Mare, El-Bab, Ezaz, El Raî û Îdlibê yên di bin dagirkerîya grûpên çekdar ên girêdayî Tirkîyeyê de ne, gelek çalakyên mezin hebûn.
