Heyeta Tahrîr el-Şam (HTS), ku berê bi El-Qaîdê re girêdayî bû, li bakur-rojavayê Sûrîyê kontrola herêmên nû bi dest xistiye û dixwaze hikûmeta Esed bi hikûmeteka Îslamî re biguherîne.
Pêşketinên dawîyê
Di heftîya borî de çekdarên HTS’ê bajarê Helebê û gelek herêmên derdorê desteser kirine. Ev yek bûye sedema guherînên mezin di şerê navxweyî yê 13 salî de. Piştî ku bajarê Helebê hatiye girtin, HTS dest bi êrîşên li ser bajarê Hamayê kiriye.
Dîroka komê
HTS di sala 2011ê de bi navê Enîya Nusra dest bi çalakîyan kiriye. Di destpêkê de bi El-Qaîdê re kar kiriye, lê di sala 2017ê de jê veqetîyaye û xwe nû kiriye. Di vê demê de navê xwe guherandiye û bûye Heyeta Tahrîr el-Şam.
Di bin serokatîya Ebû Mihemed El-Colanî de, komê li Idlibê rêveberîyeka sivîl ava kiriye. Li vê herêmê bacê berhev dike û hin xizmetên giştî pêşkêş dike. Lê belê rêveberîya wan a hişk û otorîter bûye sedema nerazîbûna gelê herêmê.
Stratejîya nû ya komê
Piştî agirbestê sala 2020ê, HTS’ê xwe ji nû ve organize kiriye û hêzên xwe perwerde kiriye. Komên çekdar ên dî yên herêmê jî bi wan re hevkarî kirine. Li gor analîstan, lawazîya Rûsya û Îranê, ku niho bi şerên dî ve mijûl in, rê li ber êrîşên HTS’ê vekiriye.
Piştgirîya Tirkîyê
Li gor çavdêran, HTS ji Tirkîyê piştgirî digire. Ji bo ku penaberên Sûrî vegerin welatê xwe, Tirkîye dixwaze kontrola herêmên nû bike. Ji Tirkîyê çek, cil û bergen leşkerî û alîkarîyên mirovî têne herêmê. Lê Wezîrê Karên Derve yê Tirkîyê Hakan Fidan ev yek red kiriye.
Paşeroja herêmê
Ne dîyar e ka HTS dê bikaribe Heleb û herêmên nû di bin kontrola xwe de bihêle an na. Çavdêr dibêjin ku HTS’ê divê li Helebê polîtîkayên xwe yên hişk biguherîne, ji ber ku ev bajar ne wek Idlibê muhafazakar e. Her wiha rêveberîya bajarekî mezin wek Helebê dê ji bo HTS’ê pirsgirêkên nû derxe holê.
Bandora li ser herêmê
Girtina Helebê ji bo çekdaran serkeftineka mezin e, ji ber ku ev bajar navendeka aborî ya girîng e. Di sala 2016ê de windakirina vî bajarî ji bo çekdaran derbeka giran bû û desthilatdarîya Esed xurt kiribû.
Çavkanî:
- Botan Times
- The New York Times
- Çavdêrxaneya Sûriyeyê ya Mafên Mirovan
sitesinden daha fazla şey keşfedin
Subscribe to get the latest posts sent to your email.
