Li gorî daneyên Navenda Dokumentasyonê ya Weqfa Mafên Mirovan a Tirkiyeyê (TÎHV) di 4 salên dawî de 9 jê zarok 1 jê astengdar bi giştî 18 kesan ji ber wesayîtên zirxkirî yan jî wesayîtên hêzên ewlehîyê û wesayîtên sazîyên fermî jiyana xwe ji dest dane. 14 ji wan zarok, herî kêm 50 kes jî birîndar bûne.
Mirina Abdulgaffar Dayan ê 23 salî ku di 24ê Çileya 2022an de li Cizîrê wesayîta zirxkirî lê dabû, mirin û birîndarbûna ji ber wesayîtên zirxkirî careke din êxiste rojevê.
Li gorî daneyên TİHVê yên par (2021) di encama li hev qelibîna wesayîtên hêzên ewlekariyê û saziyên fermî, di 9 bûyerên cuda de 4 jê zarok, herî kêm 6 kesan jiyana xwe ji dest dane. Dîsa 6 jê zarok 15 kes jî birîndar bûne.
Daneyên çar salên dawî ku TİHVê belavkirine wiha ne:
• Di sala 2018an de di 17 bûyerên cuda de 31 kes ku 6 ji wan zarok in, di encama qezaya wesayîtên hêzên asayîş û saziyên giştî de birîndar bûne. 7 kes mirine, 2 ji wan zarok û yek jê astengdar.
• Di sala 2019an de di 6 bûyerên cuda de 2 jê zarok 3 kes di encama qezaya wesayîtên asayîşê û saziyên giştî de birîndar bûne. 3 kes mirine, yek ji wan zarok.
• Di sala 2020an de di 2 bûyerên cuda de 1 kes bi lêxistina wesayîteka hêzên ewlehiyê birîndar bûye. 2 zarok mirine.
• Di sala 2021ê de 6 kesan ku 4 ji wan zarok bûn di 9 bûyerên cuda de di encama lêxistina wesayîtên asayîşê û saziyên giştî de jiyana xwe ji dest dane; 6 jê zarok 15 kes birîndar bûne.
