“Mehek e ez li nexweşxaneyê radikevim”

Ji bo Ingilîzî Bitikîne

Di ser erdhêjên Mereşê re, ku bandor li 10 bajaran kir, mehek zêdetir dem derbas bû. 

Semsûr yek ji wan bajaran e ku di erdhejê de bi wêranîyê re rûbirû ma.

Siltan Hemşîre ya ku bi eslê xwe ji Semsûrê ye ji bo bajarê xwe dibêje, “Em ne dikarin vegerinê ne jî dikarin lê bimînin”

Ew bi salan e li Nexweşxaneya Kahtayê di beşa çavdêrîya krîtîk de kar dike. 

Wê piştî xebatên bi salan ji malbata xwe re xaniyek kirîye, lê ew xanîya ku bi keda salan girtiye di şeva erdhejê de bi serê wan de hatiye xwarê.

Siltan Hemşîre dibêje ew û malbata xwe bi tesadufî ji felaketê filitîne.

“Min dev ji malbata xwe berda çûm hawara birîndaran’’

Jiyana me di şeveke de serûbin bû. Di wê felaketê de min dev ji malbata xwe berda ez çûm hawara wan kesên birîndar. Lê ne nexweşxane hebû ne jî xebatkarên rizgarkirinê.

Siltan Hemşîre

“Ne dikarim biçim ne jî dikarim bimînim”

Di dema xeberdana me de, Siltan Hemşîre tevî ku di ser erdhejê re mehek derbas bûye jî nekaribû tiştên ku dîtine bîne ziman.

Wê dem dem bêhneke kûr digirt û car din dest pê dikir. Çavên wê tijî dibûn lê wê nedihişt ku hêsrên wê biherikin ser hinarikên wê.

Li hevok û peyvan digere Siltan Hemşîre. Dibêje, “Ez çi bêjim kêm e çi bêjim nîvço ye.”

Li Samsunê me malek eyar kir. Min hemû malbata xwe şand wê derê. Wan nedixwestin biçin lê li vir ne kon heye ne jî mal. Ez tenê li vir im niha. Mehek e ez li nexweşxaneyê radikevim. Şev û roj ji min re wekî hevdu ne. Ne dikarim biçim ne dikarim bimînim. Naxwazim bajarê xwe berdim lê ez ê çi bikim?

Siltan Hemşîre

Siltan Hemşîre ji bo li bajarê xwe bimîne hewil dide konteynirekê bi dest bixe.

Wê serî li gelek mercîyan daye, lê heta niha ji wan ne bersivek hatiye ne jî dengek.

Hêjayî bîrxistinê ye, Serokomarê Tirkîyê Recep Tayyîp Erdogan di rojên borî de li Semsûrê gotibû ku hin kêmasî çêbûne û ji welatîyên wir xwestibû ku heqên xwe lê helal bikin.