KURTEPIRS: Fırat Cewerî

Heke te nameyek ji xwedê ra binivîsîya dê te çi bigota?

Min ê bigota; ey Xwedayê erd û asîmanan, fesadî û gelacîyê ji nav me rake, şer û pevçûnan rawestîne, erda xwe nehejîne, agir bi ser me de nebarîne, zikê birçî têr bike, aştî û aramîyê bîne.

Kesayetê/a tu herî zêde jê hez dikî kî ye?

Mîr Celadet Alî Bedir-Xan e.

Heke te bo xwe cîhanek ava bikira te nedixwest çi lê biqewime?

Şer, erdhej û şewat.

Kîtêba herî zêde tu jê hez dikî kîjan e?

Darizandin, Franz Kafka. Gelek ji me serpêhatîya lehengê romanê Josef K. jîyane, dijîn.

Gava tu mirî bi taybet dixwazî kî bê ser gora te, çima? (mirî an sax ferq nake; bi du risteyan)

Ez dixwazim Mîr Celadet Alî Bedir-Xan were ser gora min, axaftinekê bike, bibêje; min jîyana xwe da ziman û edebîyata kurdî, te da dû şopa min, ez û Cizîrî û Xanî li bihiştê li benda te ne.

Herî zêde çi te xemgîn dike?

Gava yên herî zêde min xwe di ber wan de êşandîye û diêşînim, min diêşînin.

Heke te navek li bircên Dîyarbekirê bikolaya ev dê navê kê bûya?

Wê navê Şêx Seîd bi îmzeya Rojen Barnas bûya.

Te dixwest li kîjan serdemê bijî?

Ez ji vê serdemê razî me.

Heke cardî bihatayî dinyayê, te yê çi tişt cardî bikira?

Min ê dîsa bixwesta binivîsim û di cîhana edebîyatê de bilivim.

Berîya mirina xwe herî pir dixwazî çi pêk bînî?

Romanên di xeyalên xwe de li rastîyê bigerînim.

Tu herî zêde çi xeyal dikî?

Xweşî, şadî û serfirazîyê.

Li vê heyatê çi di dilê te da bûye kûl û derd?

Dexs, çavnebarî, şelafî, şer û pevçûn.

Heke te bixwesta tiştekî xwe biguherî ew dê çi bûya?

Nizanim.

Serkeftina te ya herî mezin çi ye?

Disiplîna şexsî û rêwîtîya bêwestan û rawestan e.

Nivîskar/rojnameger

Engin Ölmez
Engin Ölmez
Derçûyê beşa Edebîyat û Zimanê kurdî û Mastera bitez a kurdî ye. Olmez, ji bilî karê akademîyê li Mirza Basım Yayım Dağıtım Sanayi ve Ticaret Limited Şirketi (Pirtukakurdi)yê wekî asîstan xebitîye. Wî edîtorîya 3 kitêban û redaktorîya kitêbekê kirîye. Li companîya Thotsê a Çînê karê deşîfrasyonê di zimanê kurdî da kirîye. Wî li ser malpera Kurdshopê, wek qunciknivîs li ser edebîyat, çand û hunerê nivîsîye. Ew li Botan Internationalê wekî edîtorê nivîsaran dixebite.