YSPê ji bo mîtînga Amedê bang kir

Partîya Çepên Kesk ên Amedê banga beşdarîya mitînga Amedê kir û gotin: “Werin em tev li mitînga fînalê û serkeftinê ya Amedê bibin.”

Partîya Çepên Kesk dê di çarçoveya hilbijartinên 14ê Gulanê da (sibê) mîtîngên fînalê li Amed, Wan û Stenbolê li dar bixe. Mitînga Amedê dê roja şemîyê saet di 13.00an da li Qada Îstasyonê bê lidarxistin. 

Hevserokê Kongreya Civaka Demokratîk (DTK) û namzetê parlamenterîyê yê Partîya Çepên Kesk ê Amedê Berdan Ozturk, Berdevkê Partîya Çepên Kesk Îbrahîm Akin, Hevseroka Partîya Herêmên Demokratîk (DBP) û namzeta parlamenterîyê ya Mêrdînê Salîha Aydenîz, Serokê Partîya Azadî Ayetullah Aşîtî, Serokê Giştî yê Partîya Sosyalîst a Kurdistanê (PSK) Bayram Bozyel, Cîgira Hevserokên Giştî yên Partîya Sosyalîst a Bindestan (ESP) Beycan Taşkiran, nûnerê Komeleya Şoreşgerên Demokratîk a Kurd (DDKD) û namzetên Partîya Çepên Kesk ên Amedê dê beşdarî mitîngê bibin.

Her wiha hunermend Şehrîbana Kurdî û Grup Golgedekiler jî dê derkevin ser dikê.