Erol Onderoglu, nûnerê Rojnamegerên Sînornenas (RSF) ê Tirkiyeyê, dê careka dî li 15ê Çirîya pêşîn derkeve ber dadgerên Mehkemeya Giran a Stenbolê.
Ev mehkemekirin ji ber beşdarbûna wî di kampanyaya piştgirîya rojnameya muxalif a alî-kurd Özgür Gündem de ye ku di Gulana 2016ê de pêk hatiye.
Ligel Onderoglu, du kes dî jî hene: mafparêz mirovan Sebnem Korur Fincanci û rojnamevan û nivîskar Ahmet Nesin.
Birêvebirê Giştî yê RSFê Thibaut Bruttin dibêje: “Bi 22 caran derketina pêş mehkemeyê ji bo kampanyayeka sembolîk a li dijî pirrengîya medyayê, nûnerê me li Tirkiyeyê ketiye sala xwe ya nehem a mehkemekirina bêdadî. Ev mehkemekirin ne tenê mudaxeleya siyasî ya li ser karûbarên mehkemeyê nîşan dide, herwiha şûrê Damoklesî ye ku li ser çalakîyên RSFê li Tirkiyeyê hatiye rakirin. Em bang li mehkemeya tirkan dikin ku Erol Onderogluyî berat bike û dawîyê li vê tacîza mehkemeyî bîne.”
Beraeteka şikestî
Di Gulana 2016ê de, Erol Onderoglu û nêzî pêncî kesayetên naskirî bi dorê bûne edîtorên mêvan ên sembolîk ên rojane yên Özgür Gündemê (“Rojeva Azad”), ku ew rojname hingê ji alîyê rayedarên tirk ve dihat tehdîdkirin. Ji ber gotarên ku di vê kampanyaya piştgirîyê de hatine weşandin, niho Onderoglu û du edîtorên mêvan ên din, Sebnem Korur Fincanci û Ahmet Nesin, bi sûcên “propagandaya terorê”, “pesindana sûcî an sûcdaran” û “qebûlkirina sûcan” tên mehkemekirin.
Li gor Qanûna Dijterorê ya hejmara 3713 û zagona cezayî ya tirkan, sûcdarên ev sûc kirîn dikarin cezayê 14 sal û 6 mehan bistînin. Onderoglu ji ber heman dozê ketiye hepsê û derketiye lê doza wî dewam dike.
Erol Onderoglu, ji Sibata 1996ê ve nûnerê RSFê yê Tirkiyeyê ye, rojnamevan û mafparêzekê biheyecan ê azadîya çapemenîyê ye ku gelek xelatên navneteweyî standine. Raporkirina wî ya durust, ku li seranserê cîhanê tê naskirin, ew kiriye kesayetîyekê pêşeng li Tirkiyeyê.
Çavkanî: RSF, Botan Times
https://rsf.org/en/t%C3%BCrkiye-22nd-hearing-rsf-representative-judicial-harassment-must-stop
