Îsraîlê ragihand ku wê êrîşî pergalên çekên stratejîk ên li Sûriyê kiriye û hêzên wê yên leşkerî bi awayekê “sînordar û demkî” ketine nava axa Sûriyê. Bi awayekê hevdem, Kremlînê diyar kir ku Putin bi xwe ji bo penaberîya Esedî biryar daye.
Armanca êrîşên Îsraîlê
Wezîrê derve yê Îsraîlê Gideon Saar li Qudsê got: “Tenê berjewendîya me ewlekarîya Îsraîlê û hemwelatîyên wê ye. Me êrîşî pergalên çekên stratejîk kir da ku çekên kîmyewî û fûzeyên dûr-firr nekevin destê komên tundrew.”
Operasyonên bejahîyê
Artêşa Îsraîlê wêneyên leşkerên xwe yên li herêma Çiyayê Hermonê belav kirine. Ev herêm dikeve bakur-rojhilatê Bilindahîyên Colanê ku Îsraîlê di sala 1967an de ji Sûriyê girtibû û di 1981ê de bi yek alî îlhaq kiribû.
Helwesta welatên din
Îranê bi rêveberîya nû ya Sûriyê re dest bi danûstandinan kiriye. Rayedarên payebilind ên Îranê ji Reutersê re gotin ku ev têkilî ji bo aramîya herêmê girîng e.
Brîtanyayê diyar kir ku ew ê rewşa Heyeta Tehrîr el-Şam a ku di sala 2017an de wek rêxistineka terorîst hatibû ragihandin, ji nû ve binirxîne. Ev kom bû serekê êrîşa li dijî rejîma Esedî.
Wezîrê derve yê demkî yê Fransayê Jean-Noël Barrot ragihand ku ew ê di demeka nêzîk de nûnerekê taybet bişînin Şamê.
Helwesta Rûsyayê
Berdevkê Kremlînê Dmitrî Peskov got ku biryara penaberîya Esed û malbata wî ya li Rûsyayê ji alîyê Putin ve hatiye dayîn, lê hê planên hevdîtinê tune ne. Li Moskovayê balyozxaneya Sûriyê ala sê-stêrk a muxalefetê hildaye.
Çavkanî:
- The Guardian
- Reuters
- Botan Times
