Rewşa Rojhilata Navîn di van rojên dawî de gihîştiye asteka nû ya alozîyê. Pevçûnên berdewam di navbera Îsraîl û Hizbullahê de li Libnanê, êrîşên berdewam li ser Xezeyê û tevlihevîya zêde bûyî ya di navbera Îsraîl û Îranê de, hemû bûne sedem ku herêm ber bi qeyraneka mezintir ve biçe.
Di heman demê de, bandorên mirovî yên van pevçûnan her ku diçe zêdetir dibin. Li Libnanê, gelek nexweşxane hatine girtin û karmendên tenduristîyê di bin xeterê de ne. Li Xezeyê, êrîşên li ser navendên tenduristîyê didomin û hejmara qurbanîyan zêde dibe. Herwiha, plana Îsraîlê ya êrîşkirina li ser armancên leşkerî yên Îranê dibe sedema fikarên mezin ên li ser pêşeroja herêmê. Ev rewş, pêdivîya lezgîn a çareserîyeka aştîyane û hewildanên dîplomatîk ên berfireh destnîşan dike.
Konseya Ewlekarîyê ya NYyê: Em di fikarê de ne
Li gorî nûçeya AFPyê Konseya Ewlekarîyê ya Neteweyên Yekbûyî roja duşemê daxuyanîyek weşandiye.
Di daxuyanîyê de, ku navê Îsraîlê bi taybetî nehatiye nivîsîn, 15 endamên konseyê “ji hemû alîyan xwestin ku ji bo ewlehî û selametîya personelên UNIFILê û avahîyên wê rêzê bigirin. Wan da zanîn ku aştîparêzên NYyê û avahîyên NYyê tu carî nabe ku bibin armanca êrîşekê.”
Mudaxeleya konseyê piştî du civînên girtî yên li ser rewşa xerab a li Libnanê pêk hat.
Li Libnanê halê xizmetên tenduristîyê
Wezîrê tenduristîyê yê Libnanê, Firass Abiad, ragihandiye ku niho 13 nexweşxaneyên li wî welatî bi temamî an jî qismen hatine girtin. Wî got ku êrîşên Îsraîlê ji destpêka pevçûnan bi Hizbullahê re sala borî ve bûne sedema mirina zêdetirî 150 bijîşkên ambûlansê û karmendên tenduristîyê. Abiad Îsraîl bi “hedefgirtina beşa tenduristîyê” tawanbar kiriye.
Artêşa Îsraîlê gotiye ku êrîşên wan li dijî şervanên Hizbullahê û jêrxaneya wê ne.
Çavkanî: The New York Times, Botan Times
Plana êrîşa Îsraîlê
Îsraîlê biryar daye ku dê di êrîşa xwe de armancên leşkerî yên Îranê bike hedef. Ev biryar dibe ku rîska şerekê mezin kêm bike. Lê belê, Îsraîl hê jî dikare gelek armancên leşkerî û avahîyên hikûmetê bide ber êrîşan. Li gorî du rayedarên Îsraîlî yên ku agahî dane, Îsraîl dikare êrîşî cihên avêtina fûzeyan, depoyan, kargehên çêkirina fûze û dronan, bingehên leşkerî û avahîyên hikûmetê bike.
Êrîşa li ser nexweşxaneya Xezeyê
Li gorî Bijîşkên Sînornenas, êrîşeka Îsraîlê li ser kompleksa nexweşxaneyeka Xezeyê bûye sedema mirina herî kêm 5 kesan û birîndarbûna bi dehan kesan. Êrîş li ser Nexweşxaneya Şehîdên El-Eqsa pêk hatiye. Êrîşê konên Filistînîyên koçber şewitandine û gelek kes bi birînên şewatê birîndar bûne. Kesên ku ji êrîşê rizgar bûne, gotine ku li Xezeyê tu cihekê ewle nemaye.
Rewşa Libnanê
Li gundê Aîtûyê yê Libnanê, êrîşeka hewayî ya Îsraîlê bûye sedema mirina herî kêm 21 kesan. Artêşa Îsraîlê gotiye ku wan êrîşî armanceka Hizbullahê kiriye. Aîtû li herêmeka piranî filehan e ku berê nebûbû hedefa êrîşên Îsraîlê. Li alîyê dî, êrîşên şevê yên Îsraîlê li Bealbekê zirar dane nexweşxaneyekê û ew ji kar xistine. Neteweyên Yekbûyî hişyarî daye ku êrîşên Îsraîlê li dijî Hizbullahê pergala tenduristîyê ya Libnanê xistiye xeterê.
Fermandarê Îranî
Lîwa Esmaîl Qaanî, fermandarê Hêza Qudsê ya Îranê, piştî gelek spekulasyonan, di vîdyoyeka nûçeyên dewletê yên Îranê de xuya bûye.
Hêza Qudsê beşa Supayê Pasdaran a Îranê ye ku operasyonên derveyî dimeşîne û çavdêrîya Hizbullah û Hemasê, dike.
Ji ber krîza aborî ti xebatkarên daîmî yên Botan Timesê nînin. Murat Bayram bi dildarî weşanê didomîne. Heger hûn bixwazin em li ser pêyan bimînin piştgirîya me bikin. Ji bo piştgirîyê bibin abone. Ji 200 hezar xwendevanên me û 5 hezar şopînerên qenala me ya YouTubeyê li ser hev 500 kes bibin abone em dikarin li ser pêyan bimînin.
Botan Times - sitesinden daha fazla şey keşfedin
Subscribe to get the latest posts sent to your email.
