Hamdi ciwanekê ji Batmanê ye ku li bajarê Stenbolê karê şofêrîya texsîyan dike. Ew bi wê yekê tê nasîn ku mûzîka kurdî nîşanî mişterîyên xwe yên bîyanî dike. Gelek kes ji ber xweşlawîya wî jê dipirsin ka çima ew modelîyê nake.
Hamdiyî bersiva pirsên Botan Timesê da
Di 6 mehan de hînî Ingilîzîyê bûm
11 sal in me mala xwe bar kiriye Stenbolê. Min 7 salan karê înşaatê kir. Piştî ku me berê xwe dayê karê înşaatê êdî baş naçe birayê min dest bi şofêrîya texsîyan kir. Min jî pey wî dest pê kir. Niho, dema dibe şev li kolanên bajarê Stenbolê de karê şofêrîyê dikim.
Gelek mişterîyên biyanî dihatin min jî dixwest bi wan re biaxivim. Ji beriya 7 mehan min dest pê kir ku pirsan ji miştêrîyan bikim û ji wan hînî Ingilîzîyê bibim.
Ez heta astekê hîn bûme. Piştî hingê min got ez vîdeoyan bigirim. Vîdeo gelekê belav bûn. Gelek kesan temaşe kir.
Kurmancên me, min bi zorê dibin xwarinê
Keyfa kurmancên me ji min re tê. Carinan xwe diavêjin ber texsîya min. Hinek kes bi texsî an motora xwe pêşiya erebeya min digire. Rêyê digirin û bi zorê min dibin xwaringehê. Dema ez têr jî bim li min dikin mecbûrî ku bixwim. Tu dizanî dixwazin hezkirina xwe nîşan bidin. Ez ji ber vê yekê keyfxweş im. Tişta zêdetir min keyfxweş jî dike ew e ku mirovên zana û têgihiştî, dixtor, akademîsyen, mihendiz ji min re dinivîsin û min pîroz dikin.
Gelek kesên tirk jî ji ber ku ez di vîdeoyên xwe de mûzîka kurdî lê didim û kurdî hînî mişterîyan dikim êrîşî min dikin. Peyamên tehdîtkar dişînin. Lê ez mûzîka tirkî jî vedikim dîsa jî êrîşê dikin.
Were bibe model!
Hin kes û hin şirket teklîf dikin ez modelîyê bikim. Lê ez ji bo wê ne hazir im. Dixwazim karekê ez dizanim bikim. Helbet naxwazim heta hetayê li Stenbolê karê şofêrîyê bikim. Dixwazim biçim Amerîkayê, li wê derê baş hînî Ingilîzî bibim. Paşê dixwazim karê Uberê bikim.
***
