Piranîya beşdarên anketa Musk xwest ku ew ji Twitterê vekişe

Encama anketa xwedîyê Twitter Elon Musk bêli bû. Musk ji 122 mîlyon şopînerên xwe pirsîbû ku ka ew dest ji rêvebirina Twitterê berde yan ne.

Ji 122 mîlyon şopîneran, 17,5 milyon kes tevlî anketê bûn û ji wan jî % 57,5ê şopîneran xwest ku Musk dest ji rêvebirina Twitterê berde.

Musk, platforma medyaya civakî Twitter di Cotmehê de bi 44 mîlyar dolaran kirî û bi guherandinên li ser platformê rê li ber minaqeşeyan vekir.

Hefteya borî, Musk hesabên hin rojnamegeran cemidandibû û li ser vê yekê Neteweyên Yekbûyî (NY) û Yekîtîya Ewrupayê (YE) ew rexne kiribû.

NYê dîyar kiribû ku azadîya medyayê ne lîska zarokan e û YEê jî dabû zanîn ku ew dikarin dijî Twitterê toleyan ragihînin.