Li Tirkiyeyê her çend germahîya havînê sîyaset dabe jibîrkirin jî di ser gera yekem a hilbijartinên krîtîk ên sala 2023yan re 2 meh derbas bûn.
Piştî hilbijartinan dê di nava partîyên muxalefetê da guhertinek çêbibe an na, hê jî ne diyar e.
Niha rojeva însanan ji xeynî buhabûn û pirsgirêkên jiyanê tu tişteke din nîne.
Di dema hilbijartinan da li paş derîyên girtî çi hatine axaftin hêdî hêdî derdikevin holê.
Serokê Partîya Zaferê Ûmît Ozdag aşkere kir ku di gera duyemîn a hilbijartina serokkomarîyê wan bi Kiliçdaroglu ra ji bo 3 wezarettan li hev kiribûn ku di nav da Wezareta Karên Naxweyî û Serokatîya MÎTê jî hebûne.
Ozdag ji T24ê ra diyar kir ku wan bi Kiliçdaroglu ra ji bo her 3 wezaretan peymanek îmze kiribûn. Lê ji bo pêvajoya hilbijartinê partîyên din bertek nîşan nedin heta niha vê yekê aşkere nekiriye.
Li dijî van gotinên Ozdag ji Partîya Çepên Kesk (YSP) bertekek hat nîşandan ku di dema hilbijartinên 14ê Gulanê da piştgirîyeka bihêz dabû Kiliçdaroglu.
Parlamenterê YSPyê yê Agiriyê Sirri Sakik derbarê vê babetê ji bo Botan Timesê axivî.
“Me ji bo Tirkîyeyeka demokratîk dengê xwe da”
“Me bêşert ji bo demokratîkbûna Tirkîyeyê dengê xwe da Kiliçdaroglu. Lê niha em dibînin ku ew bi nijadperestên tirkan ra di nava bazarîya statûyan da bûne. Wan bazarîya wezaret, serokatî û şêwirmendan kirine. Esasen di hilbijartinan da herî zêde ew têk çûn.
Sirri Sakik
“Neheqîya herî mezin wî li vî gelî kiriye”
Parlementerê YSPyê ji bo Kiliçdaroglu dibêje;
Neheqîya herî mezin wî li vî gelî kiriye. Wî bi derewên mezin, bi bazar û peymanên veşartî sîyasetaka çawa bi rê ve biriye derket holê. Bi milyonan mîrov ji bo guhertînek çêbibe dengên xwe dan wî, lê ew çûye û bi partîya herî nijadperest ra ketiye nava bazariyan. Beriya bê hilbijartin ev bazarî kiriye, kî dizane eger bihata hilbijartin dê çi bikira?
Sirri Sakik
Wê demê di nava partîya xwe da min rexneyên xwe yên ji bo piştevanîya Kiliçdaroglu kiribûn, lê ez rastî bertekan hatibûm. Partîya min biryar dabû ez jî li gor wê biryarê tevgerîyam.
Sirri Sakik
Sakik ji bo hilbijartinên herêmî jî, ku tê pêşbinîkirin Adara 2024an pêk bê, diyar kir ku ew ê piştgirîya tu partîyeke din nekin. Dê YSP li hemû bajaran namzetên xwe nîşan bide.
Hilbijartinên 14ê Gulanê YSPya ku piştgiriyeka bi hêz dabû Kiliçdaroglu rêjeya dengên wê sedî 11,7an daketibû sedî 8,8an.
Sala 2018an bi temamî 67 parlementerên HDP/YSPê hebûn. Ev reqema di hilbijartina 2023yan dakete 62 parlementeran.
