Reuters – Ahmet Turk ê 82 salî cara sêyemîn ji şaredarîyê hatiye dûrxistin

Çirîya paşîyê 4, 2024

Li Tirkîyeyê hikûmetê sê şaredarên DEM Partîyê yên bajarên Mêrdîn, Batman û Halfetîyê ji kar dûr kiriye. Ev biryar piştî pêşnîyara aştîyê ya du hefteyan hatiye dayîn. DEM Partî di parlamentoya Tirkîyeyê de partîya sêyemîn a herî mezin e.

Sedema biryarê

Wezareta Karên Navxweyî ya Tirkîyeyê îdîa kiriye ku şaredar bi PKKê re têkilîdar in. Ev yek bûye sedema dûrxistina wan ji karê wan. Her sê şaredar jî îdîayên li ser xwe red kirine û li dijî biryarên vî cezayî serî li dadgehê dane.

Helwesta DEM Partîyê

DEM Partîyê ev biryar şermezar kiriye û gotiye ku ev yek li dijî îradeya gelî ye. Partîyê dîyar kiriye ku ev êrîşeka li dijî sîyaseta demokratîk a gelê kurd e ku ji sala 1994ê ve didome. Di daxuyanîya xwe de partîyê gotiye: “Di demekê de ku me hêvî dikir destê aştîyê dirêj bibe, îradeya gelî hatiye binpêkirin.”

Şaredarê Mêrdînê

Ahmet Turk ê 82 salî cara sêyemîn ji şaredarîyê hatiye dûrxistin. Ew di meha Gulanê de li ser bûyerên sala 2014ê hatibû cezakirin. Berîya niho jî gelek şaredarên DEM Partîyê û partîyên berîya wê bi heman awayî ji kar hatibûn dûrxistin.

Pêşnîyara aştîyê

Devlet Bahcelî yê serokê MHPê û hevalbendê Erdogan berîya du hefteyan pêşnîyar kiribû ku Abdullah Ocalan were parlamentoyê û dawîya şerî îlan bike. Li gorî pêşnîyarê, di rewşeka holê de dê îmkana azadîya Ocalan were nirxandin.

Bandora sîyasî

Serokê Şaredarîya Stenbolê Ekrem Imamoglu li ser vê mijarê gotiye ku hikûmetê kontrola xwe winda kiriye û di nava tevlihevîyê de ye. Ev dûrxistin di salvegera girtina Selahattin Demirtaş û rayedarên dî yên partîyê de pêk hatiye.

Çavkanî: