Polîsan berê nûçegîhanên bianetê Tûgçe Yilmaz û Alî Dînç asteng kirin ku bûyerên desteserkirinan dişopandin. Paşê ew devûrû danîn erdê derb li wan dan. Polîsan Yilmaz û Dînç desteser nekirin û serbest kirin. Nûçegîhanên bianetê wê giliyê polîsan bikin.
Polîsan duh di dema pîrozbahiya Newrozê ya li Stenbolê de tundkarî li nûçegîhanên bianetê Tûgçe Yilmaz û Alî Dînçî kir. Her weha polîsan xwest ku edîtorê bianet kurdiyê Aren Yildirimî desteser bike.
Dema bername qediya û beşdarên bernameyê belav dibûn, polîsan hin kes desteser kirin. Tûgçe Yilmazê jî dema desteserkirinan dişopand û wêne û vîdeoyên wan digirt. Polîsan destpêkê jê re gotin “wênegirtin qedexe ye.” Yilmazê ji polîsan re got ku “ez rojnameger im” û bi berdewamî dîmen girtin. Polîsan vê carê ew devûrû li erdê dirêj kirin û pêl li qirika wê kirin, derb lê dan. Her weha polîsan derb li Alî Dînçî jî dan û ew asteng kirin. Polîsan xwest ku edîtorê bianet kurdiyê Aren Yildirimî jî desteser bike.
Piştî vê rewşê Yilmaz û Dînç çûn nexweşxaneyê û rapora derbkirinê wergirtin. Yilmaz û Dînç wê giliyê polîsan bikin.
Nûçegîhana Evrenselê Eylem Nazlierê vîdeoya dema polîsan tundkarî li Yilmazê dikir girtiye.
Nûnerê Rojnamegerên Sînornenas (RSF) yê li Tirkiyeyê Erol Onderoglûyî bertek nîşanî vê rewşe da û diyar kir ku ew tundkariya polîsan a li dijî rojnamegeran û desteserkirina nûçegîhana AFPyê Eylul Yaşarê protesto dike
