Pall weşanê sê kitêbên nû derxistin.
Pall weşanê Pirtûka Baranê, Surra Hisretê û Çend Helbestên Din û Heft û Heştên Mirinekê çapkirin û belavkirin.
Pirtûka Baranê
Nivîskarê kitêbê Armîn Temerzade ye.
Cureyê kitêbê helbest e.
Beşek ji nivîsara danasîna berhemê:
Agirek tune ye
ji bilî xolemêşa dilê min
ku te bi çavên xwe
pê xistiye.
Eger ew agirê te,
veşartî be li nav pêlên tarî
an azad be li nava kulîlkan,
hêvî û wêrekî
dê her hebe
ji bo van Kaweyan.
Şorişek tune vê carê
laşê min ê melûl
naşibe serwekê
li ser vî milê hejar
tune dengê Tezerwekê!
Surra Hisretê û Çend Helbestên Din
Nivîskarê kitêbê Elîxanê Memê ye. Kitêb ji alîyê Ferec Koyistanî ve hatîye amedekirin ku wî ji herfên kirîlî latînîze kirîye. Herwiha çend helbest jî lê zêde kirine.
Beşek ji nivîsara danasîna berhemê:
Ez ê pirs kim: – Qîzik,
kîjan rengî hiz dikî?
hergê cabê bide:
– Ê sor!
Ez ê bixemilînim
sîng û berê qîzê
bi gul-sosinêd sor.
Ez ê pirs kim: – Qîzik,
kîjan rengî hiz dikî?
Hergê cabê bide:
– Ê sor!
Ez ê wergirim
bejn û balêd qîzê
bi kincê sor.
Edîtor: Yehya Omerî
Heft û Heştên Mirinekê
Nivîskarê kitêbê Înan Eroglu ye.
Cureyê kitêbê çîrok e.
Beşek ji nivîsara danasîna berhemê:
Çîrokên Heft û Heştên Mirinekê ya sêbeşî, li ser zemîneke xurt bi hev ve hatine girêdan ku ev zemîn bi firewantirîn maneya xwe, cîhana honakî ya berhemê ye. Gotinên dayikekê ku bi neyekserî tebeqeyan li honaka berhemê zêde dikin, zeman, mekan û karakterên dîrokî ku em şik û gumanê ji rastiya wan dibin. Hûrgiliyên rasteqîn, çîrokan ne nêzî rasteqîniyê lê nêzî cîhana fantazmayê dikin û edebiyatê ne nêzî rasteqîniya req lê nêzî vegêraneke edebî dikin.
Xaleke din a van çîrokan jî ew e ku ji babet û temayên van çîrokan zêdetir, aliyên girtî û kêmmayî yên van çîrokan in ku meraqa me radikêşin. Digel van aliyan, di gelek çîrokan de tîrahiyeke berçav heye ku ji kana romaneke danizilî avê vedixwe.
Heft û Heştên Mirinekê bi zimanekî kamil, kûrfikir û bi rîtma xwe ya rewan, xwendineke hûr û dûr pêşkêşî xwînerên xwe dike.
