MEBê biryar daye ku ligel ingilîzî êdî almanî jî li mekteban bê fêrkirin. Par li çend mektebeyan ceribandine û hem dersa ingilîzî hem jî dersa almanî dane pola 5an.
Îsal biryar daye ku di bernameya MEBê da, di çarçoveya bernameya ‘pirzimanî’ da, êdî zimanê almanî jî bê dayîn û saetên almanî zêde kirine li gorî berê.
Li gorî nuçeya GazeteDuvarê di çarçoveya wê biryarê da, îsal li 81 bajaran, li 300 mekteban, di polên 5-6an da, metoda pirzimanî dê bê tetbîqkirin. Xwendekar dê 14 saetan ingilîzî û du saetan jî almanî fêr bibin.
Li Tirkiyeyê ji sala 2012an vir ve zimanê kurdî wekî dersa bijarte bo polên 5,6,7,8 li dibistanan tê xwendin.
Dersa zimanê kurdî di bin banê MEBê da, ji sala 2012-2013yan heta niha bo polên 5-6-7-8an tê dayîn. Herçiqas bi awayekî fermî tayînên mamosteyan têne kirin jî hejmareka gelek kêm (2-3) kes tayîn dibin ku li gorî rêjeyê û pêdivîyan kêm e. Herî dawî, sala 2023yan 50 tayîn ji bo kurdî (35 kurmancî, 15 zazakî) hatibûn kirin. Par jî bo kurdî 10 mamoste hatibn tayînkirin.
Li Bakurê Kurdistanê û Tirkîyeyê bi milyonan kurd dijîn û bi zimanê kurdî (kurmancî, zazakî) diaxivin. Dema mirov li statuya zimanê kurdî ya li Tirkîyeyê dinêre mirov dibîne ku ziman di bin polîtîkayên asîmîlasyon û bişaftinê da ye. Digel ku xwestek û talebên perwederdeya kurdî hene jî zimanê kurdî wekî zimanê ingilîzî li mektebeyan, bi qasî ingilîzî heqê xwe nabîne. Statuya zimanê kurdî, ne li MEBê ne jî li sazî û dezgehên din yên dewletê cihê xwe yê rewa nabîne.
