KURTEPIRS: Bahoz Baran

Heke te nameyek ji Xwedê ra binivîsîya dê te çi bigota?

Derfeteka wisa hebûya jî min ê nenivîsîya. Baş dizanim pirsên min dê li ser raza hebûn û gerdûnê bûna. Çîroka mirovî, çîrokeka pir trajîk e, bi qasî trajîkbûna xwe jî nepen e, pêhesîna vê jî barek e jixwe. Naxwazim razên vê çîroka me ya trajîk hîn bibim. Hema bila hinek pirs hebin û em tim li dû wan pirsan bin, bersivên tekûz yên wan pirsan lazim nînin. Ew pirs divê mîna bêdawîbûnê, negihîjin cihekî û hêvîya me ko nekin. Li gorî min, aqil bi xwe jî hêmaneka xwedayî ye, dîyologeka afirîner ya bi wî ra, baştir e. Nameyek tune be jî dibe. Loma ez ê ji Xwedê ra nameyekê nenivîsim.

Kesayetê/a tu herî zêde jê hez dikî kî ye?

Ji kurdan Ehmedê Xanî, wekî din ji Nietzcheyî hez dikim.

Heke te bo xwe cîhanek ava bikira te nedixwest çi lê biqewime?

Min dê nehişta nîjadperestîya tûnd û jehrîn tê da hebûya. Helbet ew cure nîjadperestî xwe digihîne ezezî, çavtengî, nefsmezinîya mirov û neteweyan. Û ya herî giring jî dê bêşermî û bêrehmî tê da tune bûna. Min dê nehişta li wir aqil ji dilî bêhtir çalak bibe. Aqilê bêdil, bêhest, belaya serê mirovahîyê ye.

Bi 100TLyan (3 Dolar) bibe abone. Ji bo medyaya Kurdî ya serbixwe #MeTuHeyî, heger ji te neyê 100 TLyan bidî, her tişt ji bo te belaş e lê heger tu bikarî heqê keda Kurdî bidî kerem bike bibe abone.

Kîtêba herî zêde tu jê hez dikî kîjan e?

Hene hin pirtûkên ber dilê min, lê serdilka min hîn jî Mîrzayê Biçûk e. Salê carekê miheqeq dixwînim. (Çend caran min stendîye, lê heçko ling ketine ber, nehewîyaye çûye ji mala min.)

Gava tu mirî bi taybet dixwazî kî bê ser gora te, çima? (mirî an sax ferq nake; bi du risteyan)

Bila xwendevaneka/î jêhatî were. Ji ber ku tim dixwazim rûyekî nû bibînim û gotinên nû bibihîzim.

Herî zêde çi te xemgîn dike?

Bişaftin û bîrnebirîya (bênezaketîya) mirovan.

Heke te navek li bircên Dîyarbekirê bikolaya ev dê navê kê bûya?

Em navekî li bircan nekolin. Heyfa bircan. Em dikarin navê Celadet Alî Bedirxanî li ser wan li ba bikin.

Te dixwest li kîjan serdemê bijî?

Ji serdema ku lê dijîm razî me. Lê min dixwest di nîvê sedsala 19an da hinekî bijîyama, ne pir.

Heke cardî bihatayî dinyayê, te yê çi tişt cardî bikira?

Min ê dîsa, bi zimanê xwe helbet, binivîsîya. Nikarim li jîyaneka bênivîs bifikirim û bijîm.

Beriya mirina xwe herî pir dixwazî çi pêk bînî?

Çîrokên di nav hiş û dilê xwe da binivîsim û kulîyata xwe ya çîrokan temam bikim. Pirtûkên ku di lîsteya xwendina min da ne bixwînim.

Tu herî zêde çi xeyal dikî?

Dixwazim li welatê xwe yê azad, bê şer û pevçûn bijîm û binivîsim. Zimanê min ji qeyd û bend û qedexeyan rizgar bibe.

Li vê heyatê çi di dilê te da bûye kûl û derd?

Bişaftina neteweya min, ji min ra kul û derd e.

Heke te bixwesta tiştekî xwe biguherî ew dê çi bûya?

Karpirî min aciz dike. Carna mirov ji neçarî û xemxurîya xwe gelek karan dike, lê ev tiştekî ne rast e.

Serkeftina te ya herî mezin çi ye?*

Xebat û têkoşîna min a li ser zimanî ya piralî.

Nivîskar/rojnameger

Engin Ölmez

Derçûyê beşa Edebîyat û Zimanê kurdî û Mastera bitez a kurdî ye. Olmez, ji bilî karê akademîyê li Mirza Basım Yayım Dağıtım Sanayi ve Ticaret Limited Şirketi (Pirtukakurdi)yê wekî asîstan xebitîye. Wî edîtorîya 3 kitêban û redaktorîya kitêbekê kirîye. Li companîya Thotsê a Çînê karê deşîfrasyonê di zimanê kurdî da kirîye. Wî li ser malpera Kurdshopê, wek qunciknivîs li ser edebîyat, çand û hunerê nivîsîye. Ew li Botan Internationalê wekî edîtorê nivîsaran dixebite.