Gelo ji te bêhneke çawa tê? Tu nikarî xwe bêhn bikî, lingê xwe yê pêşîn dirêjî pozê xwe dikî, belê jê bêhnek tê, bêhna axê. Tu difikirî, tu jî ewqas di bin tavê de digerî, çima ji wan bêhna tavê tê lê ji te bêhna axê.
***
Kevirên biçûk, biçûk, biçûk hene li her derê. Tu serê xwe dizivirînî kî derê keviran dibînî, wekî cîhana keviran e. Tu jî dixwazî xwe wek kevirekî hîs bikî, çênabe. Destê te nerm e mesela, ne wek kevirekî ye, an jî hemû bedena te bi rengekî ye, wek wan keviran ne rengcihê ye. Tu dinêrî, ferqeke te heye ji wan, lê çi ye? Mesela tu kêzikek î gelo di nav wan de digerî? Lê kêzikeke çawa? Mûrî, pindir? Lingên wan gelek in, yên te dudu ne, tu her du destên xwe jî dihesibînî, dibin çar. Dîsa nikarî bibî wek wan. Tu kêzikek î lê te jî hêj biryar nedaye ka kîjan kêzik. Kîjanî herî nêzîkî te ye? Belê, dibe ku yek hebe ku dişibe te lê nizanî.
Axir, di nav keviran de digerî, kevirên wek agir, wekî kartolên ku nû ji sobê derketine, germ in. Tu di nav wî agirî de digerî û dixwazî riya xwe bibînî. Hinek tên, ji ser te derbas dibin, ji bo ku tu xwe biparêzî hema xwe ji nav qulên biçûk ên keviran berdidî binî, heta ku derbas dibin. Piştî ku derbas dibin tu hilmeke kûr distînî û dîsa li riya xwe berdewam dikî. Tu jî nizanî esas berê te ber bi ku ve ye, tu di nav cîhana keviran de yî. Lê balkêş e, te tu car ev qas bi baldarî li wan nenêrîbû. Hinek ji wan wekî neqişkirî ne, xemilandî ne. Hinek ji wan bi rengên zehf xweşik hatine pêçandin. Tu heyirî dimînî, te çima berê ev keşf nekirine. Ji bo ku tu wan bibînî, hewce ye tu bûbûya kêzik, têketa nav cîhana wan û di nav wan de bigeriyayî?
Tu pozê xwe nêzîkî wan dikî, bêhn dikî. Bêhna tavê ji wan tê. Gelo ji te bêhneke çawa tê? Tu nikarî xwe bêhn bikî, lingê xwe yê pêşîn dirêjî pozê xwe dikî, belê jê bêhnek tê, bêhna axê. Tu difikirî, tu jî ewqas di bin tavê de digerî, çima ji wan bêhna tavê tê lê ji te bêhna axê. Dibe ku tu nêzîktirî axê yî ji wan. Lê ew jî bi axê re zeliqî ne. Belkî ew nikarin xwe tev bidin, lewma tenê bêhna tavê li ser wan dimîne, lê tu her dem digerî, piyên te li ser wan bişewite jî digerî, ji ber vê wekî ku tu bi axê re bûyî yek. Jixwe tu jî dizanî, heke tu demekê xwe tev nedî, tu yê di nav axê de bihelî û wenda bibî. Tu nikarî wek keviran li ser xwe bimînî, lewre ew ê tu car nehelin û bêhna tavê dê di nav xwe de kom bikin.
