HÛDA PAR: Ger Tifaqa Miletî bi ser bikeve wê Kurd vegerin salên 90î

Ji Hilbijartina Serokkomarîyê û ya Parlamenteriyê a Serdema 28an ku dê di 14ê Gulana 2023yan da bê lidarxistin 10 roj mane.

Partîyên sîyasî propagandayên xwe yên dawî dikin.

Partîya Doza Azadê (HÛDA PAR) eşkere kiribû ku ew ê pişgiriyê bidin Erdoganî. Her wiha li sê bajaran jî ji lîsteyên AKPyê namzetên wan yan parlementerîyê hene.

Partî ev demeke ye bi gotinên xwe yên di derbarê Kurdan da ketiye rojevê. 

Li gor Alîkarê Serokê Giştî yê HÛDA PARê Şeyhmus Tanrikûlûyî ji ber gotinên wan yên di derbarê kurdan da ew hedef tên nîşandan. 

Li ser pirsgirêka kurdan û mijarên tên miraqkirin me ji Tanrikûlûî pirsî.

“AKPyê ji bo kurdan gavên wekî şoreşgerî avêtine”

Li gor nêrîna Tanrikuluî heta desthildariya AK Partîya an jî heta 2002yan her zilm li kurdan hatine kirin û Kurd hatine perçiqandin.

Ew dibêje, “Her çiqas HDPyê qebûl neke jî AKPyê ji bo kurdan gavên şoreşgerî avêtine.”

“Divê di zagona Tirkîyeyê da maf û navê kurdan jî hebin”

Partîya ku di demên dawî da bi gotinên xwe yên li ser kurdan derdikeve pêş ji bo pirgêrêka kurdan jî hin pêşnîyarên wan hene.

Şeyhmus Tanrikûlû dibêje;

Divê Kurd bibin xwedî statu û hebûna kurdan di zagona Tirkîyeye da bi resmî bê naskirin.

Di zagona niha da tenê pênaseya Tirk û Tirkbûnê tê kirin. Divê zagon bê guhertin.

Zimanê resmî yê Tirkîyeyê erê Tirkî ye. Lê belê divê kurdî jî wekî zimanê duyem bê naskirin û di zagonê da bên nivîsîn.

Divê di warê îdarî da rêveberîyên herêmî an bi hêzkirina şaredariyan xaleke girîng e.

Şeyhmus Tanrikûlû

“Ger Tifaqa Miletî bi ser bikeve wê Kurd vegerin salên 90î “

Li gor Şehmus Tanrikuluî ger Tifaqa Miletî bi ser bikev dê hemû destkeftiyên kurdan ji dest biçin û Kurd vegerin salên 90î.

Tanrikuluî diyar dike ku ger Tifaqa Miletî bibe desthilatdar wê TRT Kurdî bê girtin û zimanê kurdî wê li rojname, kovar û malperan bê qedexe kirin.

“Ji ber em perwerdehiya zimanê zikmakî dixwazin kemalîstên di nava CHPyê da me hedef nîşan didin. Dê vana çi bidin kurdan. Niha HDP û Kandîl jî piştgiriya Kiliçdarogluî dike. Lê ger ew bibin desthilatdar wê Erdogan bi findê bigerin.”

Şeyhmus Tanrikûlû

“Ez jî ji doza Hîzbullahê ketim girtîgehê”

Li ser pirsa me ya gelo têkiliya we bi Hîzbullahê ra heye an na? Tanrikulu vê bersivê dide;

“Têkilîya me ya bi Hîzbullahê ra nîne. Muxalefet dixwaze wekî ku têkilya me bi Hizbullahê ra heye nîşan bide. Ez ji doza Hîzbullahê ketime girtîgehê û derketim. Min cezayê xwe kişandiye û niha sîyasetê dikim. Keseke nikare me mehkum bike. Niha di nava HDPyê û TÎPê da gelek kes hene ku ketine girtîgehê û derketin û niha wekîl in. “

Şeyhmus Tanrikûlû

Partî çi wextî hatiye damezrandin?

Partiya Doza Azadî, (Hûda Par) di 19ê Kanûna  2012an de hatiye damezrandin.

Serokê giştî ya Huda Parê ya niha Zekeriya Yapıcıoğlu ye.

Patî ji lîsteyên AKPyê bi 4 namzetan dê bikeve hilbijartinên 14ê Gulanê.