Şaredarîya Dîyarbekir, li Birca Keçikê pêşangeheke bi navê ”Her Du Çavên Min Dîyarekir – Çar Mewsim” vekir.

Pêşangeh, bi fotografên platforma bajêr bi hevkarîya Federasyona Hunera Fotografan ya Tirkîyê (TFSF) hatiye hazirkirin.

Li gor danasînê pêşangahê, wênehezan ji Mijdara 2021an pê ve fotografên Dîyarbekir li platforma dîjîtal ya şaredarîyê bar kirine û berpirsan jî ji fotografan bijareyek çêkiriye.

Ji wênehezan, Fatîh Yılmaz bi ”Hasbîhal” bûye yekem. Kübra Soylu bi ”Dewa Hamam” bûye duyem û Emrah Yıldız jî bi ”Köprü” di rêza sêyan de ye.

Gotineke Cahit Sikti Taranci jî, ku şaîrekî Dîyarbekirî ye, li pêşangehê hatiye bi cîh kirin.

“Hezkirina Diyarbêkirê wezîfeyek e û wezîfeyek wusa miqedes e ku nayê piştguhkirin.”

Berpirsê ewlekarîya pêşangehê ji Botan Timesê re da zanîn ku rojane bi qasî hezar kes serdana pêşangehê dikin. Wî dîyar kir pirtir kal û pîr têne pêşangehê.

Li gor berpirsê ewlekarîyê, jiber ku reklama pêşangehê baş nehatiye kirin kêm kesan hay ji pêşangehê heye.

Pêşangeha Her Du Çavên Min Dîyarbekir – Çar Mewsim heta 31ê Berfenbarê vekirî ye.