Di çarçoveya benameya Kurtepirsê da, me ji 22 kesan 14 pirs kirin. Di vê nivîsarê da em dê bersivên “Heke te nameyek ji xwedê re binivîsîya dê te çi bigota?” li vê derê kom bikin ka kê çi bersiv daye bo vê pirsê.
Heke te nameyek ji xwedê re binivîsîya dê te çi bigota?
Berken Bereh
Ka ew bihara ez li bendê bûm
Ka ew karxezala te pesnê wê dida?
Sayîme Xakpûr
Gelek gilî û gazinên min ji Xwedê hene, bi taybet min ê gazindên rewşa me kurdan jê bikira ku tu çima dengê xwe nakî Xwedêyo…
Süleyman Çevik
-Min ê jê bixwesta: Gelê min bi hev bide hezkirin û bila xêra hevûdu bixwaze.
Fırat Cewerî
Min ê bigota; ey Xwedayê erd û asîmanan, fesadî û gelacîyê ji nav me rake, şer û pevçûnan rawestîne, erda xwe nehejîne, agir bi ser me de nebarîne, zikê birçî têr bike, aştî û aramîyê bîne.
Omer Faruk Baran
Selam Xudêo,
Dîrekt ji gunehan dest pê dikim: Ku gunehên min pir in jî min çi kir min ji ber eşqa edebîyatê, seba zimanê me yî di bin zilmê de kir. Tu vê meselê zanî zatenî.
Bavê min, Mistefa kurê Ferîde 70 salan bi nimêj û nîyaz li ser rêya te bû. Min bo xatirê wî, bo xatirê ewlîya û embîyayan, bo xatirê pîrûpakan û pêxemberan af ke, li rêya heq rêwan ke û li hizûra şahê merdan û merdê meydan mêvan ke, ji wan diayên dostên te.
Ha, li hidûdê Sirûc û Kobanîyê, wê şeva qaçax, wê şeva min hêvî û omdîya xwe ji te tam birîbû te ez ji mayîn û qurşînan, te ez ji mirinê xelas kirim. Min ew rindîya te hîn bîr nekiriye. Sax bî, Xudê ji te razî be.
Mektûba min hinekî dirêj bû, biqedînim. Ji dinyaya boş û betal barek silav û..
Heqet te dinya seba çi çêkir, seba çi em têde rezîl û riswa bûne wanî û ew sosyal medyaya hanê wê milet hîn çito bike, wê hîn biajo çi bela û bêtaran?
Li benda cewabên te me, ji [email protected] re bişîne ji kerem û rehma xwe. Spas.
Omer, kurê Zelo.
Fahriye Adsay
Hey te em xuliqandin, îjar çima berê xwe ji me diguherî, Xwedê jê razî?!
Fırat Aydınkaya
Tê bîra cenabê te? Te ji melekan re got: Ez ê li ruyê erdê xelîfeyekî bixuluqînim. Melekan jî gotibû: Em te bi pesn û sena tesbîh û zikir dikin, tu yê dîsa jî kesekî ku fesadîyê bike, xûnê birijîne bixuliqînî? Te ji wan re gotibû: ez tiştên ku hûn nizanin dizanim. (Bakara-30)
Gelo cenabê te hîn jî li ser fikra xwe ye?
Berfîn Zenderlioğlu
– Silav, perçeya min a nîvcoyî, ji kerema xwe bes e. Bisekine û bêhna xwe bide. Te em fetisandin.
Murad Demîr
Gelo ji kerema xwe tu dikarî hindek mirovan dîsa bînî ser rûyê dinê?
Selîm Temo
“Ma ne bes e?”
Veman Lîneva
Min dê bigota, Xwedê, min ewqas dilniyaz bi navê te ji bo Kurdistanê kirine, erê çima te carekê tenê jî bersiv neda. Te çima pirtûkek bi zimanê kurdî ji xelkê re rênekire ser erdê? Çima ewqas dijminatiya li hember Kurdistanê dipejirînî, yan tu bi xwe jî dijminê Kurdistanê yî? Eger tu dijminê Kurdistanê bî, wê demê çima te Kurdistan çêkiriye? Û eger tu dadperwer î, ka dadperweriya te li hember Kurdistanê?
Lokman Ayebe
… ji bo keda te pirr spas lê te hinekî din jî serê xwe pê re biêşanda ji te dihat ku te ev dinyaya hîn baştir û hîn xweşiktir biafiranda. Û weke peyva dawiyê, ricaya min ji te xwe zêde têkilî karê mirovan neke.
Mehmet Atlı
Ka edalet?
Eylul Nazlîer
Di vê gerdûnê de tu tenê yî û di vê dinyayê de ez tenê me were em çayekê vexwin û dev ji vê tenêtîyê berdin!
Ayhan Geverî
Madem her ev kêlîye ye û dinya her eve ye, bo çi hinde bar û hinde esrar?
Resul Bafeyî
Xwedê ma gunehê me kurdan çi bû? Kê ji me guneheke mezin kiriye ku em vê êşê dikêşin.
Bahoz Baran
Derfeteka wisa hebûya jî min ê nenivîsîya. Baş dizanim pirsên min dê li ser raza hebûn û gerdûnê bûna. Çîroka mirovî, çîrokeka pir trajîk e, bi qasî trajîkbûna xwe jî nepen e, pêhesîna vê jî barek e jixwe. Naxwazim razên vê çîroka me ya trajîk hîn bibim. Hema bila hinek pirs hebin û em tim li dû wan pirsan bin, bersivên tekûz yên wan pirsan lazim nînin. Ew pirs divê mîna bêdawîbûnê, negihîjin cihekî û hêvîya me ko nekin. Li gorî min, aqil bi xwe jî hêmaneka xwedayî ye, dîyologeka afirîner ya bi wî ra, baştir e. Nameyek tune be jî dibe. Loma ez ê ji Xwedê ra nameyekê nenivîsim.
Burhan Sönmez
Xwedayê ezîz, ez hêvî dikim ku hûn hebin.
Şîraz Baran
Te îro bo min çi kir?
Jehrmar
Ey Xuda çi tiştên xirab hebe li ser rûyê dinê rake, aramî bide di nav dilê mirovan ku bila dilê yekûdu nehêlin, şer û tiştên şerî hemûyan rake da ku em yekûdu nekujin. Mûzîka Kurdî jî bi xêra xwe li dinyayê belav bike 🙂
Sadiq Ûskan
-Nizanim!
Ali Kemal Çınar
Ka tu li ku derê yî?
