Îro 8ê kanûna pêşiyê, çekdarên HTS ketine Şamê û rejîma Esedî hilweşiyaye. Fransa û gelek welatên din hilweşîna rejîmê pîroz kirine. Li gorî çavkanîyan, Beşar Esed ji welatî reviyaye û cihê wî nayê zanîn.
Fransa dibêje dem hatiye ku yekîtî pêk were
Serokkomarê Fransayê Emmanuel Macron gotiye ku “Dewleta hovane hilweşiyaye” û hêviya aştî û azadiyê ji gelê Sûriyê re xwestiye. Wezareta Karên Derve ya Fransayê ji bo Sûriyê gazî yekîtiyê kiriye û xwestiye ku hemû pêkhateyên civakê bên parastin.
Serokwezîr amade ye ku desthilatê radestî bike
Serokwezîrê Sûriyê Mihemed El Celalî gotiye ku ew amade ye bi her serkirdayetiyeka gelê Sûriyê hilbijêre re hevkariyê bike û desthilatê radest bike.
Girtîgeh hatine vekirin
Li gorî çavkaniyên herêmî, deriyên girtîgeha Seydnaya ya navdar li nêzî Şamê ji bo hezaran girtiyan hatine vekirin. Ev yek piştî ketina çekdarên HTS ya nav bajarî pêk hatiye.
Bandora li ser herêmê
Tirkiye ragihandiye ku ew dixwaze ewlehiya Sûriyê misoger bike. Libnan hêzên xwe li ser sînorê Sûriyê zêde kiriye. Îsraîlê jî got ku ew ê herêma tamponê ya di navbera herdu welatan de kontrol bike.
Helwesta Rûsyayê
Wezareta Karên Derve ya Rûsyayê ragihandiye ku Esed welatî terikandiye û fermana radestkirina desthilatê bi aştî daye. Rûsyayê got ku ew bi hemû komên opozisyonê re di têkiliyê de ye.
Çavkanî:
- FRANCE 24
- Botan Times
