Wezareta Karên Navxwe ragihandîye ku qeyûm bo şaredariyên Mêrdîn, Batman û Xelfetîyê tayîn kirine.
Wezareta Karên Navxwe bi daxuyanîyeka nivîskî da zanîn ku wan qeyûm danîye ser şaredarîyên Mêrdîn, Batman û navçeya Xelfetîyê ya Rihayê.
Li gorî daxuyanîyê, li Mêrdînê Tuncay Akkoyun şûna Ahmet Turk hatîye tayînkirin.
Hevseroka Şaredariya Batmanê Gulistan Sonuk ji kar hatîye dûrxistin û walîyê Batmanê Ekrem Canalp bûye qeyûm.
Her wiha Hevserokê Şaredarîya Xelfetîyê Mehmet Karayilan ji kar hatîye dûrxistin û Qaymeqamê Xelfetîyê Hakan Başoglu bûye qeyûm.
Li gorî daxuyanîya Wezareta Karên Navxwe Ahmet Turk, Gulistan Sonuk û Mehmet Karayilan bi endamtîya PKKyê hatine tohmetbar kirin.
Paralementera DEM Partîyê ya Mêrdînê Saliha Aydenizê ragihand ku qeyûm tayînî Şaredarîya Bajarê Mezin a Mêrdînê hatîye kirin.
Herwiha Şaredarê Mêrdînê, Ahmet Turk jî peyamek belav kirîye li ser Xê.
Saliha Aydeniz
Bo Şaredarîya Bajarê Mezin a Mêrdînê qeyûm tayîn kirine ku ev şaredarî piştî ewqas gêndelî û 8 salên bêhiquq bi îradeya gel hatibû bidestxistin. Bêhiqûqî ye û li dijî demokrasî û etîkê ye, ew kesên ji terefê xelkê ve hatine hilbijartin, şûna wan tayînan bikin. Vê îqtidarê bi salan e rastîya îradeya gel qebûl nekirîye û vê yekê bi polîtîkayên qeyûman ên faşîst şiklê xwe girtîye. Em qeyûmê we qebûl nakin! Em nahêlin hûn şaredarîya me xesp/talan bikin. Şaredarîya Bajarê Mezin a Mêrdînê ya xelkê ye û dê her wisa jî bimîne!
Ahmet Turk:
Em dê ti carê dev jê bernedin. Em dê di rêya micadelaya azadî, aştî û demokrasîyê da gavekê paş da neavêjin. Em xespkirina îradeya gel qebûl nakin. Bila ev baş bê zanîn!
Gûlîstan Sonuk
Hilbijartinên 31ê Adarê, me li temamîya Tirkîyeyê, bi rêjeya herî bilind a rehyan, bi keda jin, ciwan û gelê xwe, şaredarîya xwe bi dest xist aniha jî berî ku teblîgatek an jî agahdarkirinekê bikin bo me, spêdeyê şaredarî xesp kirine/dest danîne ser. Me ev rejîma talanker qebûl nekir û em qebûl nakin jî. Şaredarî yên xelkê ne.
