24ê Îlonê, li Amedê polîsan bi ser Komeleya Lêkolînê ya Çand û Zimanên Mezopotamyayê (MED-DER), Payîz Pirtûk û Koperatîfa Ziman, Çand û Perwerdê ya Ankayê da girt.
Payîz Pirtûk kitêbfiroş e û ew zêdetir kitêbên kurdî difiroşe. Herwiha Komeleya Lêkolînên Ziman û Çandên Mezopotamyayê MED-DER jî sazîyeka zimanî ye û li wir zimanê kurdî tê fêrkirin.
Li gorî nûçeya Ajansa Mezopotamyayê Baroyên Amed, Agirî, Batman, Mêrdîn, Riha, Şirnex û Wanê daxuyanî daye derbarê serdegirtinên sazîyan da û bang li mercîyên eleqedar kirîye ku kesên desteserkirî bêne berdan.
Daxuyaniya baroyan wiha ye:
Kesên bi operasyonê hatine binçavkirin kesên sivîl ên bi karê zimanê kurdî ve eleqedar in, nasnameya wan a aktîvîstiyê li pêş e. Serdegirtin saziyan û binçavkirina van kesan li dijî aktîvîzma zimanê kurdî ye. Ev yek her wiha bi krîmînalîzekirina zimanê kurdî, gelê me ji xebatên zimanî yên kurdî jî dûr dixe.
Li Tirkiyeyê her çiqas zimanê kurdî ji xeynî bikaranîna di zimanê fermî de û li saziyên giştî weke teorik nehatibe astengkirin jî em dibînin ku bi biryarên nehiqûqî fîîlen astengî li ber bikaranîna zimanê kurdî tên derxistin. Her wiha weke vê hin kiryarên dezgehên dewletê rê didin dûrbûna ji xebatên zimanê kurdî.
BANGA BERDANÊ
Em bi bîr dixin ku karên eleqedarê zimanê kurdî li gor qanûnan ne sûc e. Di her qadê de jiyîn û parastina vî zimanî mafê her kurdekî ye. Em ê vî mafî li her derê biparêzin. Bi rêya darazê tevî hînbûn an hînkirina zimanê kurdî sedembûna tehdeya li ser karên zimanî yên kurdî nehiqûqî ye.
Em weke Tora Komîyon ên Zimanê Kurdî yên Baroyên Herêmê bi bîrxistina girîngiya çanda plurîzmê bang li rayedaran dikin ku girtin û serdegirtinên li malên aktîvîzmên zimanê kurdî nehiqûqî ye û divê aktîvîstên zimanê kurdî demildest bên berdan.”
